أحلى صحبة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

والسنين بتفوت وأنا واقف مكاني

اذهب الى الأسفل

والسنين بتفوت وأنا واقف مكاني Empty والسنين بتفوت وأنا واقف مكاني

مُساهمة من طرف سعاد ايمن الإثنين يونيو 22, 2020 12:36 pm

"والسنين بتفوت وأنا واقف مكاني"

يومك بيعدي حرفيا من غير ما تعمل أي حاجة مفيدة؟!
لو جيت في آخر اليوم وعملت جرد للحاجات اللي إنت عملتها هتتصدم حقيقي وهتلاقي نفسك معملتش أي حاجة تستحق الذكر، يومك كله ضايع ع النت والفيديوهات، ويعدي اليوم اللي بعده واللي بعده وفجأة تلاقي الشهر خلص وخرجت منه زي ما دخلت.. صفر!

طب وبعدين؟.. إيه الحل وإزاي أقدر استفيد من يومي قدر الإمكان.. مش شرط أستفيد منه كله، المُهم إني لما أبص آخر اليوم ألاقي إني عملت حاجة واليوم ما ضاعش مني.
الحل بسيط، كلنا بنكتب أهداف وجدول يومي والحاجات دي وأغلبنا مش بيلتزم بيها، يومين تلاتة ويزهق وميكملش.

لو دورت ع السبب هتلاقي كله بيكون مُتحمس في البداية فيقوم كاتب قايمة بحوالي 20 هدف هيعملهم كل يوم، وبينتهي في الآخر بالفشل وإنه معملش ولا هدف واحد منهم!

هنا الموضوع مُختلف، إنت هتركز ع هدف واحد بس لمدة 30 يوم، هات ورقة وقلم واكتب كل الأهداف الـ 20 دي وابدأ اختار منها هدف واحد ع حسب درجة الأهمية اللي تناسبك وجربه لمدة 30 يوم.

وليكن مثلا حددت يكون هدفك إنك تتعلم إنجلش.. يبقى الأول شوف المصدر اللي هتتعلم منه وابدأ قسمه ع 30 يوم، لنفرض إن المصدر كورس ع اليوتيوب عبارة عن 30 فيديو مثلا، يبقى كل يوم هتتفرج ع فيديو وتذاكره.

بس.. هو ده الهدف الوحيد اللي هتكتبه في القايمة أو في الجدول اليومي بتاعك.. ومن غير ما تستقلّ وتقول صفحة طويلة عريضة مش هكتب فيها غير هدف واحد بس؟.. أه عادي، أحسن من 20 هدف معرفتش تحقق منهم ولا واحد.. عملية تحقيق الأهداف مُعتمدة ع الاستمرارية.

وهكذا بقى بالنسبة لأي هدف تاني، الفكرة إنك تقول لنفسك الشهر ده هدفي الأساسي هو كذا وابدأ وزّع الهدف ع 30 يوم بحيث كل يوم تنجز جزء بسيط منه. مش شرط الأهداف دي تكون اكتساب أو تحقيق عادة جديدة، ممكن يكون الهدف هو إنك تتخلص من عادة سيئة في خلال 30 يوم، زي إنك تقلل من وجودك ع السوشيال ميديا وتبدأ تحط خطة متوزعة ع الـ 30 يوم.

وهسيب لك في الكومنتات مجموعة من العادات اللي ممكن تكتسبها والعادات السيئة اللي ممكن تقلل منها.

وكمان محاضرة ع تيد بتتكلم عن نفس الموضوع.

بالشكل ده لما توصل لآخر يوم في الشهر وتبص ع الإنجاز اللي إنت عملته حقيقي هتحس بإنك نجحت وقدرت تستفيد من الشهر كله وتحقق التارجت اللي إنت حددته من البداية..

والأهم في الموضوع هو إنك ما تعبتش نفسك ولا عملت مجهود كبير يعني، دي حاجة بسيطة كل يوم في متناول إيدك لكن في آخر الشهر هتلاقي إن الحاجة البسيطة اللي استمريت عليها كل يوم دي بقت عبارة عن قطعة كبيرة جدا تم إنجازها. وهتدخل الشهر الجديد مُتحمس جدا حماس يخليك تكتب أهداف جديدة وتعيد نفس الكلام بدون ملل.

ومن ضمن الحاجات اللي هتشجعك أكتر إنك تعمل تحدي إنت وصحابك وتتفقوا ع هدف واحد خلال الشهر وتبدأوا فيه مع بعض.

الملف موجود هنا ع قناة التليجرام:
https://t.me/readythengo

سعاد ايمن

المساهمات : 27
تاريخ التسجيل : 18/06/2020

معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

الرجوع الى أعلى الصفحة


 
صلاحيات هذا المنتدى:
تستطيع الرد على المواضيع في هذا المنتدى